Text Size

અંતરનો અનુરાગ

અંતરના અનુરાગ ભરેલાં

અંતરના અનુરાગ ભરેલાં,
ગીત ગૌરવે બધાં મઢેલાં,
સ્નેહ સુવાસે છેક છલેલાં,
અર્પું છું તમને !

અમૃતમય ને જીવનધન છે,
પ્રાણ ખરેખર મારે મન છે;
તમારી જ પૂજાનાં ફળ છે,
અર્પું છું તમને !

એક તમારે કાજે પ્રકટ્યાં,
મોહાઈ ક્યાંયે ના અટક્યાં;
તમારાં જ ચરણોમાં હરખ્યાં,
અર્પું છું તમને !

પૂજાની સામગ્રી સારી,
ભલે ન હો કવિતા કૈં ન્યારી;
ભાવભરી ભાષા છે ભારી,
અર્પું છું તમને !

બદલામાં શું તમે આપશો ?
કૃપા કરીને કષ્ટ કાપશો ?
સદાકાજ સહવાસ આપશો,
દર્શન આપીને ?

‘પાગલ’ કરે પ્રાર્થના આજે,
શિશુને તો સુખ ધરવું છાજે;
આવો અમીભરેલ અવાજે,
અંતર એ જાચે.

- © શ્રી યોગેશ્વરજી

Add comment

Security code
Refresh

Today's Quote

Faith is the bird that feels the light and sings when the dawn is still dark.
- Rabindranath Tagor

prabhu-handwriting