Text Size

અંતરનો અનુરાગ

આ વખતે તો

આ વખતે તો કૃપા તમારી મારા ઉપર થશે,
મેળાપ થશે ખરે આપણો, જૂનો વિરહ જશે;
અંતર મારું એમ કહે છે, સફળ પ્રયાસ થશે.
આ વખતે તો કૃપા તમારી મારા ઉપર થશે,

આંસુ મટી આનંદ વહેશે, આહ બધી મરશે,
આક્રંદતણો અંત આવશે, ઉજાગરા ફળશે.
અંતર મારું એમ કહે છે, જીવન ધન્ય થશે.
આ વખતે તો કૃપા તમારી મારા ઉપર થશે,

કષ્ટ સહનનું શ્રેય થશે, ને પીડા પણ મટશે,
અલ્પતા ટળી જશે બધીયે, દરિદ્રતા હટશે;
અંતર મારું એમ કહે છે, શાંતિ મને મળશે.
આ વખતે તો કૃપા તમારી મારા ઉપર થશે,

પ્રેરણા કરી આજ તપાવો, તપ તે પૂર્ણ થશે,
દૈવી દર્શન થશે તમારું, પ્રાણ ન ક્યાંય જશે.
અંતર મારું એમ કહે છે, વાર્તાલાપ થશે.
આ વખતે તો કૃપા તમારી મારા ઉપર થશે,

ચંદનશીતલ સ્પર્શ મધુથી મધુર મને મળશે,
તનમનને પલટાવીને તે પાવનતા ધરશે;
અંતર મારું એમ કહે છે, મળ સઘળા ટળશે;
આ વખતે તો કૃપા તમારી મારા ઉપર થશે,

મધુવનમાં તપતા ધ્રુવજીને ધન્ય કરેલ તમે,
બીજા કૈં ભક્તોના મનમાં રૂપ તમારું રમે.
અંતર મારું એમ કહે છે, ભાવ બધા ફળશે.
આ વખતે તો કૃપા તમારી મારા ઉપર થશે,

આજ લગ જીવન ભલેને ગમે તેમ ગયું,
હવે પણ આશાભર્યું છે મન પ્રફુલ્લ થયું;
સૂર્ય ઉગશે ખરે સોનાનો નભે મારે,
હૈયુ સાક્ષી એમ પૂરે, સુખ થશે મારે !

થશે જય જયકાર ને ઉલ્લાસ ઊભરશે,
પ્રકટશે મંગલ ઘડી, ઉજ્જવલ મને કરશે;
એજ આશાથી તપી આજે રહ્યો છું હું,
પ્રેમ પીડા સહન કરતાં આજ પ્રાર્થું છું.

તપતા તે પામતા એ નિયમ શાશ્વત છે,
માંગ મારી થશે પૂરી આજ કાલે કે;
પ્રેમ’પાગલ’ કહે અંતર વેદના મરશે,
સર્વ બિમારી જશે ને ઉષા મધુ મળશે.

- © શ્રી યોગેશ્વરજી

Add comment

Security code
Refresh

Today's Quote

Our greatest glory is not in never falling, but in rising every time we fall.
- Confucius

prabhu-handwriting