Text Size

અંતરનો અનુરાગ

આજ તો આનંદ નહીં માય !

આજ તો આનંદ નહીં માય !
દર્શન દેશો પ્રેમ કરીને, સુખ સાચે નહીં માય ! ... આજ તો.

લોચન મારાં ધન્ય થશે, ને મટશે દિલની લ્હાય;
કૃતાર્થ બનશે નવજીવનથી કરમાયેલી કાય ... આજ તો.

ઉત્સવ કેવો થશે અનેરો, વર્ણન કેમ કરાય;
સમાધિ નીરસ બનશે ત્યારે, શંકા છે ન જરાય ... આજ તો.

દેવોને પણ દુર્લભ, જેને જ્ઞાની યોગી ચ્હાય;
રૂપ નિરખવા મળશે મુજને, વેદો જેને ગાય ... આજ તો.

પ્રકાશપુંજ પુનિત રસસાગર પરિમલવાળી કાય;
લઈ આવશો મારી પાસે કરવા કાજ સહાય ... આજ તો.

કલ્પના કરી મનડું મારું દિવ્ય રસમહીં ન્હાય;
ના જાણું તો આંખ મળ્યે શી દશા અલૌકિક થાય ! .. આજ તો.

સહસ્ત્ર ધારે પ્રેમ વહેશે, રંક થશે ને રાય;
બાળકને માતાની મળશે શાંતિપ્રદાયક છાંય. ... આજ તો.

આજ વહેલી સવારથી આ મન મારું મલકાય;
ભલે પધારો, રસને રેલો, સ્નેહ ભલે છલકાય ! ... આજ તો.

ધન્ય ઘડી જીવનની ઉગશે, હૈયું આ હરખાય;
‘પાગલ’ને અમૃતપદ જડશે, કાળ પછી નહિ ખાય. .. આજ તો.

- © શ્રી યોગેશ્વરજી

Add comment

Security code
Refresh

Today's Quote

Keep your face to the sunshine, and you cannot see the shadow.
- Helen Keller

prabhu-handwriting