અલૌકિક હશે મુખડું કેવું ઈશ્વરનું મારા?
એ મુખડાને જોવા ઝંખું લઈ પ્રેમધારા ... અલૌકિક
કેવી આંખ હશે એ વિભુની, તેજભરી ન્યારી?
સુખની વીણા વાગે એમાં, શાંતિભરી સારી ... અલૌકિક
પ્રકાશિત હશે કાયા કેવી ? દિવ્ય હશે વાણી;
જોતાંવેંત જ નમું એમને, પરમાત્મા જાણી ... અલૌકિક
વંદન કરતાં કરું પ્રાર્થના, દર્દ મટાડી દો;
સંસારમહીં સઘળે સુખ ને શાંતિ સનાતન હો ...અલૌકિક
ત્યારે પ્રભુજી હસી રહેશે, હાસ્ય હશે કેવું?
દ્રશ્ય ખરેખર હશે અનેરું, એ જોવાં જેવું ... અલૌકિક
- શ્રી યોગેશ્વરજી