Text Size

આવો મારે આંગણે

આવો મારે આંગણે રેલાવી દો આનંદ !
પ્રભાતથી હું કરું પ્રતીક્ષા આજે તો સાનંદ ... આવો મારે

ફૂલમાળ છે ગુંથી મેં તો ભાવોની મીઠી,
અંગેઅંગ ચારુ ચોળી પ્રેમતણી પીઠી;
સદગુરુના શણગાર સજ્યા છે આજે ખરે અનંત ... આવો મારે

આશા ને શ્રદ્ધા આંખોમાં જ્યોત સદા ઝળકે,
મનડામાં તો મનોરથોનો મહેરામણ મલકે;
વાણીમાં તો વ્હાલ ભર્યું છે, પોષ્યું ના પાખંડ  ...આવો મારે

આસોપાલવ અવનવીન છે ભાવોના બાંધ્યા,
તપનાં કીધાં તોરણ, દિલના તારોને સાંધ્યા;
અબીલ તેમ ગુલાલ ગીતનાં ધર્યા તજીને દંભ ...આવો મારે

શરણાઈ ને વેણુ વાગે રગરગમાં છોને,
જુગો લગી જોડાઈ જાયે આતમ બે છોને;
પ્રસન્નતાનો પ્રસાદ પામું આપું તેમ અનંત ...આવો મારે

રઢિયાળું છે રૂપ તમારું જોઈને નાચું,
દિલમાં મારા ખરે કહું છું બીજું ના જાચું;
‘પાગલ’ કરૂં પ્રતીક્ષા પળ પળ રેલી રસનો રંગ ...આવો મારે

- શ્રી યોગેશ્વરજી

Add comment

Security code
Refresh

Today's Quote

Do well to your friend to keep him, and to your enemy to make him your friend.
- E.W.Scripps

prabhu-handwriting