Text Size

તમારું શરણ છે જેણે

તમારું શરણ છે જેણે સમજતાંવેંત લીધેલું,
નિરંતર પ્રેમભક્તિનું હૃદયથી દૂધ પીધેલું;
લગાડી ચિત્ત ચાહે એકભાવે કૈંક દિનથી તે
તમારાં બાળકોને શાંતિ આપો, સિદ્ધ યોગી હે !

તમોને નિયંતા જગના પિતા પ્રભુરૂપ માને છે,
સ્વજન સ્નેહી સખા સ્વામી ગુરૂની જેમ જાણે છે;
તમે કીધી કૃપા કૈંવાર પોતાનાં ગણીને તે
તમારાં બાળકોને શાંતિ આપો, સિદ્ધ, સાઈ હે !

સ્મરે તમને સ્તવે ને કૃપાની માગે સદા ભિક્ષા,
મહાજનના સમાગમની જ લીધી જન્મથી દીક્ષા;
અખંડ મિલનતણા જ મનોરથે દિનરાત મહાલે તે
તમારાં બાળકોને શાંતિ આપો, સિદ્ધ યોગી હે !

નથી અંતરમહીં ઈચ્છા જરીયે ક્ષુદ્ર કૈં રાખી,
તમારી કામના કેવલ, કથા એ સત્ય છે ભાખી;
સમર્થ વળી દયાળુ ગણી તમારી તરફ તાકે તે
તમારાં બાળકોને શાંતિ આપો, સિદ્ધ, સાઈ હે !

તમારું શરણ લે તેને કદીયે દુઃખ આવે છે ?
વિપત્તિ કલેશ તેમજ કાળ તેની પાસ ફાવે છે ?
લભે સુખશાંતિ તેમજ કરે ઉન્નતિ સર્વ રીતે તે,
તમારાં બાળકોને શાંતિ આપો, સિદ્ધ યોગી હે !

પ્રલોભનથી કરીને પાર, ભયસ્થાનો હઠાવી દો,
કરી અનુકૂલતા આનંદ ને ચેતન જગાવી દો;
તમારા પ્રેમમાં 'પાગલ’હતાશ ન થાય જોજો તે,
તમારાં બાળકોને શાંતિ આપો, સિદ્ધ, સાઈ હે !

 - શ્રી યોગેશ્વરજી

Add comment

Security code
Refresh

Today's Quote

When you judge another, you do not define them, you define yourself.
- Dr. Wayne Dyer

prabhu-handwriting