પ્રેમમાં જલવું પડે છે ભાઇ !
આગમાં જલવું પડે છે ભાઇ !
તીખા અંગારે નિશદિન ત્યાં તપવું પડે છે ભાઇ,
પોક મૂકીને, મૂંગે મૂંગે, રડવું પડે છે ભાઇ !
પંથ મહીં છે કંટક, વેદન સહવું પડે છે ભાઇ,
આપત્તિ ને સંકટ તેમાં રમવું પડે છે ભાઇ !
શૂળી પર છે સેજ સૂવું ત્યાં સ્મિતથી પડે છે ભાઇ,
સોદો સસ્તો, શીશ પહેલાં મૂકવું પડે છે ભાઇ !
તાપે છાયા, વિષમાં અમૃત, ગણવું પડે છે ભાઇ,
ધીરે ધીરે મરવું પડે છે, ટકવું પડે છે ભાઇ !
આઠે પહોર મીન પ્રેમમાં વસવું પડે છે ભાઇ,
‘પાગલ’ પ્રિયતમ પોતે કો’દી બનવું પડે છે ભાઇ !
- શ્રી યોગેશ્વરજી