ક્લેશનું કારણ

જે વીણા તારી છે તેને મારી કહીને વગાડવા માંડું છું,
આકાંક્ષા અનુસાર સૂર કાઢું છું,
ત્યારે બધોયે તાલ બગડી જાય છે.
સંગીતનો સાચો સ્વાદ ગુમાવું છું, ને ક્લેશ પામું છું.

તે જ વીણાને તારા કરુણાર્દ્ર કરમાં સોંપતાં નિષ્ફિકર બની જઉં છું.
તેનું તારી દ્વારા વાદન થતાં મંત્રમુગ્ધ બનું છું,
સંગીતના સ્વર્ગીય સ્વાદમાં કેટલીય વાર ડોલવા ને નાચવા લાગું છું :
સંપૂર્ણ સ્તબ્ધ-સમાધિસ્થ થઉં છું.

- શ્રી યોગેશ્વરજી