વાદળ, નભની પાર, આજે જાઓ !
વરસાવી રસધાર, વેગે જાઓ ! .. વાદળ.
વાસ કરે દેવી દુનિયાની,
ખેલે છે જ્યાં માત મહારી;
પવનપાંખપે જાવ પહોંચી;
કાસદ કોઈના તો થાઓ ! ... વાદળ.
ગાન વિરહનાં ત્યાં જઈ ગાઓ,
અનુકંપા ઉરમાં ઉપજાવો;
પામી પધારે તો સમજાવો,
અંતર એને લેખ લખાવો ... વાદળ.
સૂર્યચંદ્રની ગતિ છે ના જ્યાં,
પવન પહોંચે ના પાવક ત્યાં,
ધામ કહે છે એનું છે ત્યાં;
શીઘ્ર જઈને ભાળ લગાવો ... વાદળ.
દૂત તમે, નહિ રોકે કોઈ,
માર્ગ આપશે રૂપ જ જોઈ;
લોચન રાતાં રોઈ રોઈ;
સ્નેહી છો, સંદેશ સુણાવો ... વાદળ.
ભૂમિ હિમાલયની હરિયાળી,
બેઠો બાલક ત્યાં રસ ધારી;
પ્રેમતણો છે પ્યાસી એ તો,
દીધું બીજું સર્વ વિસારી ... વાદળ.
ભૂલી ગયાં તમે શું તેને?
આરામ નથી આજે એને;
પ્રેમપિયૂષ પિલાવો પ્રેમે,
નવજીવન ના જડતું કેમે ... વાદળ.
માતા સાથે પાછા આવો,
માત મળે ત્યારે મધુ ગાઓ;
ચપલામાં હરખે ચમકારો,
વૃષ્ટિ કરી અમને રસ પાઓ ... વાદળ.
નભ પૃથ્વીને મિલન કરાવો,
પટુતા તે મુજનેય બતાવો;
‘પાગલ’ પ્રાર્થે જલદી જાઓ,
મિલન અવશ્ય અમારું કરાવો ! .. વાદળ.
વાદળ, નભની પાર, આજે જાઓ !
વરસાવી રસધાર, વેગે જાઓ ! .. વાદળ.
- © શ્રી યોગેશ્વરજી