આજની હો રઢિયાળી રાત !
દર્શન થાયે દિવ્ય તમારું,
તેમ કરાયે વાત;
મધુથી મઢેલી થાવ ભલેને
મંગલ આ મધરાત ! ... આજની.
અંધારી તો પણ અજવાળી
દેજો મારી જાત;
તેજોમય હો તમારા થકી
તે, જગજનની માત ! ... આજની.
મળો મને એકાંતે આજે
સ્નેહ બની સાક્ષાત;
તનમન ને અંતરમાં મારા
ભવ્ય પાડવા ભાત ! ... આજની.
હરખાયે છો હૈયું મારું,
ગૌરવ ધારે ગાત;
ચંદ્રથકી પણ ચારુ બનીને
રમણીય કરો રાત ! ... આજની.
વ્યથા શમો ને મટો વિરહની
આજ ખરે મધરાત;
પ્રકટો એને અનુસરનારું
‘પાગલ’ પુનિત પ્રભાત!..આજની.
- © શ્રી યોગેશ્વરજી