તમારી કૃપા જરૂર થશે.
અમૃતવર્ષા વરસી રે’શે, તીખા તાપ જશે,
નીરસ ઉર રસમય બનશે, ને નવજીવન ધરશે ... તમારી.
વાદળ ઉમટ્યાં આજ વ્યોમમાં, મંગલ તે બનશે;
શુભ સંકેત કરે છે સઘળાં, વૃષ્ટિ કાલ થશે ... તમારી.
શીતલતા શમશે અંતરની, તેજ નવું મળશે;
વિખરાશે વાદળ કાલ બધાં, સાફ ગગન કરશે ... તમારી.
નાચે મોર પ્રસન્ન તેમ આ ઉર નર્તન કરશે;
પ્રાણ પ્રેમરસપાન કરીને મસ્ત બની ફરશે ... તમારી.
વિધિના લેખ લખાયા છે આ, સ્વપ્ને ના મટશે;
મિલનઘડી નિર્મિત છે તે ના પલટાશે ઘટશે ... તમારી.
‘પાગલ’ એ આશાથી તપતો, તપ સાચે ફળશે;
કુસુમથકી કોમળ કર મારી કાયા પર ફરશે ... તમારી.
- © શ્રી યોગેશ્વરજી