કૃપા કરીને દર્શન આપો, જીવન ઉજ્જવલ થાય,
પ્રાણ પ્રસન્ન બની જાયે ને પાવન થાયે કાય.
ભ્રાંતિ લઈ ભમવાનું મારે પછી રહે ના ક્યાંય,
સંતપ્ત થઈ રહે શોધવી કોઈની ના છાંય !
ઘોર ઉછાળા મારે સાગર, પકડો મારી બાંય,
કૃપા કરીને દર્શન આપો, આશા અન્ય ન કાંય.
કૃપા કરી દો, કૃપાતણી તો રહે કામના ના,
કોઈનીયે આશા તેમજ રહે લાલસા ના;
સંત-મહંત-દેવનું શરણું પછી શોધવું કાં ?
અમૃતફલ આગળ ફળ બીજાં હિસાબમાં છે શાં ?
દીનતા ટળે, અપ્લતા મરે, જીવન મંગલ થાય,
છેક પ્રફુલ્લિત બની જાય આ સ્પર્શ લભીને કાય;
બંધન તૂટે, કર્મો છૂટે, પાશ પ્રબળ સૌ જાય,
કૃપા કરો તો નિરખી નિરખી નેન તમોને ન્હાય.
બાળક માતાવિના ફરે છે ગમગીન બની જેમ,
મટી જાય ફરવાનું મારું આ સંસારે તેમ;
મૂર્તિ મઢીને મનમાં તેમજ લભી સદાનો સાથ,
રહો તમે ત્યાં રહું નિરંતર, કરું પ્રેમની વાત !
કરું કહો તે કામ તમારું, નવસંદેશ ધરું,
દેશ તેમ દુનિયામાં વિહરી નવો પ્રકાશ ભરું;
શાંતિ પ્રેમની કરું સ્થાપના, દિવ્ય સુવાસ ધરું,
તમારો બની પછી કહો ત્યાં આનંદે વિચરું.
કૃપા કરો તો સફળ બની આ સ્વપ્ન સફળ થાયે,
મેળાપ થઈ શકે તમારો, હરખ નહીં માયે;
‘પાગલ’ કહે કૃપા વિણ મળશે શાંતિ ન કોટિ ઉપાય,
ધન્ય બને કોઈ જન ના જો કરો તમે ન સહાય.
- © શ્રી યોગેશ્વરજી