તમને કોઈ કારણે છોડી ના શકીશ,
જનમોજનમ સાથ તમારો લભીશ.
હજી છોડવો હોય તો ભલે છોડે સાથ,
પોતાનું માન્યું તે ભલે ભીડે નહીં બાથ;
શંકા કરે, કટુ બોલે, મારે કદી લાત,
સ્નેહીની આંખો જલે છો, પડે છો પ્રપાત. ... તમને.
નિંદા કરે, માન તેમ સ્વાગત ના દે,
ફૂલની માળા કે ફૂલ હાથમાં ના લે;
બદનામી કરે ભલે સ્નેહી છો છોડે,
સ્તુતિ કરનારા ભલે મુખને મોડે. ... તમને.
તમે મારાં પ્રાણ તેમ જીવન થયાં,
જનમોજનમ તેમ રહેશો રહ્યા;
તમારી જ પ્રેરણાનું પાન હું કરીશ,
ગીતોના રૂપમાં વહી તમને મળીશ. ... તમને.
તમારે માટે હું બધું ખોવા છું તૈયાર,
રોવું પડે તો રોવા ને વેઠવા તૈયાર;
એકલા તમે જ મને મળો તો ઘણું,
બીડાયેલું ભાગ્ય મારું ઊઘડ્યું ગણું. ... તમને.
તમને કોઈ કારણે છોડી ના શકીશ,
જનમોજનમ સાથ તમારો લભીશ.
(રચના: ૫-૭-૧૯૫૭, શુક્રવાર)
– © શ્રી યોગેશ્વરજી