તમારો શે વિસરું ઉપકાર ?
જીવનની યાત્રામાં મુજને મળી ગયો આધાર;
મળ્યો તમારો પ્રાણપ્રદાયક શુદ્ધ સ્નેહનો સાર.
માનું કેમ કરી આભાર ! ... તમારો.
જીવન મારું તમે ચલાવો, કરો કષ્ટથી પાર;
દુઃખદર્દ ને ચિંતા ટાળો, દિવ્ય બની રખવાળ.
માનું કેમ કરી આભાર ! ... તમારો.
પ્રેરણા ધરો, પ્રકાશ આપો, દૂર કરો અંધાર;
એવી પ્રીત થઈ છે એનો ઉજ્જવળ છે અંગાર.
માનું કેમ કરી આભાર ! ... તમારો.
આતમ બંનેના એક થયા, મળ્યા પ્રાણના તાર;
શાશ્વત જીતે જીત ગણો ને હારે મારી હાર.
માનું કેમ કરી આભાર ! ... તમારો.
(રચના - ૩-૮-૧૯૫૭, શનિવાર)
– © શ્રી યોગેશ્વરજી