આત્માની વાતોનો ઘણો ઉથલાવ્યો કોષ,
વાતો કરવાથી મળે મને ના સંતોષ.
એકલા આત્માને લઈ હું તે શું કરું,
શરીર વિના કહોને તેને શે વરું !
શરીરને છોડવું ના મુજને ગમે,
પ્રાણ મારો શરીર ને આતમે રમે;
શરીરનો સ્વાદ લઈ મસ્ત બનું હું,
સાથ લભીને તમારો ધન્ય થઉં શું !
સુંદરતાના સંપુટ જેવું લઈ રૂપ,
એટલે જ અનેરું અલૌકિક અનૂપ,
પ્રકટ હો મારી સામે, કામના કરું,
એકતાના આનંદથી ઉરને ભરું,
‘પાગલ’ બે પ્રાણ મળે શરીરની સાથ,
એક બને આતમ જ્યાં અંગ ભીડે બાથ !
(૧૩-૩-૧૯૫૭, મંગળવાર)
– © શ્રી યોગેશ્વરજી