તમારાં ગીત ઘણાં ગાયાં.
અંતરના અંતરતમમાંથી તમને મેં ચાહ્યાં,
સહજ સ્વભાવે સ્વરમાં પ્રકટ્યાં, નેહ મહીં નહાયાં. .... તમારાં.
સાચા દિલનાં જીવનના અરુણોદયથી ગાયાં;
સરિતાસ્ત્રોત સમાન તમારી સોડમહીં સમાયાં. ... તમારાં.
દેવોને પણ દુર્લભ એવી ધારી મધુર કાયા,
વ્યોમમહીં વિચર્યાં એ નિશદિન દિવ્ય કરી માયા. ... તમારાં.
બદલામાં ના કૈંયે માગું, શાંત ધરો છાયા;
‘પાગલ’ પ્રાણને તૃપ્ત કરી દો આજ કરીને દયા. ... તમારાં.
(૨-૭-૧૯૫૮, બુધવાર)
– © શ્રી યોગેશ્વરજી