હૃદયમાં પ્રેમ જાગે તો બધુંયે કામ થાયે છે !
હૃદયની ભૂમિમાં નાખ્યું, મધુર બી નામનું નાખ્યું,
અમી વરસાદ વરસે તો બધુંયે કામ થાયે છે ... હૃદયમાં
નદીમાં પૂર આવે છે, કિનારા ના સતાવે છે;
સતાવે તેમના બંધન; બધુંયે કામ થાયે છે ... હૃદયમાં
કરો જપ લાખ ને તપયે કરો કે યજ્ઞયાગ ભલે,
ન પ્રગટે પ્રેમ પણ તો તે થકી ના દૈન્ય જાયે છે ... હૃદયમાં
ઉઠે જો પ્રેમનું બિંદુ હૃદયમાં ભાવનો સિંધુ,
હજારો સાધનો તેના પરમફલમાં સમાયે છે ... હૃદયમાં
રડે જે ખૂબ પ્રભુ માટે વળી પ્રાર્થે અને ગાયે,
જગતમાં તે કૃપા પામી પરમધનને કમાયે છે ... હૃદયમાં
હઠાવી પ્રાણના પડદા, જગાવી પ્રેમને તેમાં,
બની 'પાગલ' પ્રભુ પ્રગટે પછા કૈં ના ચહાયે છે ... હૃદયમાં
- શ્રી યોગેશ્વરજી