Friday, August 07, 2020

અંતસમે ગંગાજમનાજલ

અંતસમે ગંગાજમનાજલ તુલસીદલને ના ચાહું,
કોઇ કાને રામનામને ફૂંકે એવું ના ચાહું;
ગીતા કે કો શાશ્ત્રપાઠ વંચાવે કોઇ અંતસમે,
એ અભિલાષા છે ના મારી, વિનતી કરવી એ ન ગમે.

અંતકાલની ચિંતા છે ના, થવું હોય તે થાય ભલે,
મારી તો ઇચ્છા છે એક જ, દેહાભિમાન છેક જલે;
જીવન સારું પૂર્ણ તમારા પ્રેમમહીં આસક્ત બને,
પવિત્ર થાયે, સત્ય મેળવે, સિદ્ધ ને વળી મુક્ત બને.

તમારા સ્મરણ ને સેવાથી જીવન મારું ધન્ય બને,
પૂર્ણપણે પ્રાપ્ત કરું તમને આ જીવનમાં આજ તને;
ઘટઘટમાં મૂર્ત બને મૂર્તિ તમારી, પરમાનંદ ધરે,
દશા દેવને દુર્લભ છે એ, અંતર એની આશ કરે.

આંખ જુએ તમને જ ક્ષણક્ષણ, ઉત્સવ એનો રોજ કરે,
કાન તમારા સ્વર સાંભળતા અમૃતમાંહી સ્નાન કરે;
શરીર સ્પર્શે થાય સુવાસિત, વિચાર અંજલિરૂપ બને,
ક્રિયા તેમ ઉર્મિ અંતરની ફૂલ બને પૂજે તમને.

સાકારની બની લીલા કરિયે અહીં આપણે આ જગમાં,
મૃત્યુ ભય ને તાપ હઠાવી જીવી રહીએ આ જગમાં.

ઇચ્છા મારી નથી અયોધ્યા વૃંદાવનમાં દેહ પડે,
કાશી તેમ જ કૈલાસ વળી તીર્થસ્થાનમાં દેહ પડે;
કાળ તેમ સ્થળના મારે તો સમ્રાટ થવું આ તનથી,
મૃત્યુંજય બનવું ને જગતને સ્વર્ગસુખદ ગણવું મનથી.

તમારી જ પાસે છે મારું સ્થાન, નથી સંશય એમાં,
ખાતરી એની કરવી મારે, કરવું દર્શન છે તેમાં.

અંતસમે ના ભાન રહેશે, નાડી દેખાશે સઘળી,
સત્ય તમારા પ્રેમીને એ સતાવતી ચિંતા ન જરી;
તન ને મન અર્પીને તમને થઇ ગયો જે ભક્ત ખરે,
કૃપા મેળવી શક્યો તમારી તે કોઇથી કેમ ડરે ?

તમારે શરણ આવી મુજને કોઇયે ભય છે જ નહીં,
છાયા પામી દિવ્ય તમારી કોઇ ચિંતા છે જ નહીં;
'પાગલ' હું તો પ્રેમી મારી એક જ ઇચ્છા વ્યક્ત કરું,
અનંત કાલ લગી સેવા હું તમારી સાનંદ કરું.

દિલદિલરૂબા પર સ્વર છોડી આરાધું પ્રેમે તમને,
તમારો બનું, અભેદ સાધું સાથ તમારી પૂર્ણપણે.

આ દેશમાં જે ઋષિ વીતરાગી, થઇ ગયા પૂરણ ધન્યભાગી;
હરોળ તે સર્વતણી સુહાવું, પ્રેમી તમારો જગનો કહાવું !

 - શ્રી યોગેશ્વરજી

Add comment

Security code
Refresh

Today's Quote

Better to light one small candle than to curse the darkness.
- Chinese Proverb

prabhu-handwriting

We use cookies on our website. Some of them are essential for the operation of the site, while others help us to improve this site and the user experience (tracking cookies). You can decide for yourself whether you want to allow cookies or not. Please note that if you reject them, you may not be able to use all the functionalities of the site.

Ok