સાગર હોય ભલેને ખારો

સાગર હોય ભલેને ખારો.

થાય મધુર મધુથી જો એક જ
        દ્રષ્ટિ કૃપાની ઢાળો ... સાગર

ગ્રીષ્મ પાનખરને ચાહો તો
        વસંતમાં પલટાવો;
અંધારાને અજવાળી દો,
        ડૂબેલાંને તારો .... સાગર
 
જન્મ અંધને લોચન આપો,
        ભક્ત કરી દો ન્યારો;
નિરક્ષર કરો સાક્ષર કરતાં,
        ચિત્તમહીં ચમકારો ... સાગર

નિરાશાને આશા આપી દો,
        હાર્યાં તેમ હસાવો;
મૃતને સંજીવન દો, પ્રેમી
        માટે હૈયું હારો ... સાગર

'પાગલ' પ્રાણ ભલેને ખારો,
         તોય તમારો, તારો;
પોતાનો માન્યો છે તેને
        જીવજોખમે પાળો ... સાગર

 - શ્રી યોગેશ્વરજી