જોતાંવેત સમાધિ થાય,
મુજને સહજ સમાધિ થાય.
આંખ અમીમય આંખે મળતાં રાગ ઉરે ઉભરાય;
સુરતા એક થઈ જાયે ને નૂતન નેહે નહાય ... મુજને
પદ્માસનની પરવા ન મને, ધ્યાન ધરું ન જરાય;
સર્વદશામાં સર્વકાળમાં મનડું મારું હરાય ... મુજને
રૂપ તમારું મંગલ મધુરું, જોતાં પ્રાણ વણાય;
દુઃખદર્દ ને મટે યાતના, તેમ ત્રિતાપ તરાય ... મુજને
'પાગલ' પ્રાણ પ્રસન્ન બનીને કાયમ કાજે ચહાય;
નજર સમીપ રહો નિત્ય તમે, હરખ ન મારો માય ... મુજને
- શ્રી યોગેશ્વરજી