હવે ના છૂટાં પડિયે કોઈ દી,
હવે ના છૂટાં પડિયે.
કેટકેટલાં દિવસે ભેગાં મળી ગયાં,
કાયમ ભેળાં રહીએ;
આંખથી આંખમાં આનંદ આંજિયે,
પલક ના છૂટાં પડિયે ...ઓ પ્રીતમ, હવે ના
રેખા ભાગ્યની, લેખો લલાટના,
દોષ શાને હવે દઈએ ?
આયખું આખું હવે તો બદલાયું,
ચિંતા કરી શાને મરિયે ? ...ઓ પ્રીતમ, હવે ના
આઠે પહોર હવે આનંદ આંગણે,
જીવનનાં દાન ભલે દઈએ;
હૈયાની હોળીને ટાઢી કરી દઈ,
વહાલ પર વારી જઈએ ...ઓ પ્રીતમ, હવે ના
ચિંતા ને વેદનાને મારી દઈને,
ગૌરવ ગીતડાં ગાઈએ;
મૃત્યુ જરા ને જન્મ વ્યાધિ છો જીવતા,
ફાકી કરીને ફરિયે ...ઓ પ્રીતમ, હવે ના
આંખમાં આંખડી, સોડમાં સોડને,
હૈયે હૈયું ધરી દઈએ;
પાગલશા એક બની શાંતિનો શ્વાસ લઈ,
સ્વપ્ને છૂટાં ના પડિયે ...ઓ પ્રીતમ, હવે ના
- શ્રી યોગેશ્વરજી