વરસાવો કૃપાવૃષ્ટિ હે સંતન સાચા !
સરજી દો નવી સૃષ્ટિ હે સંતન સાચા ! ... વરસાવો.
પરોપકારને કાજે, ધરી કાયા પ્રેમી કાજે;
કરી દો સત્ય તે આજે હે સંતન સાચા ! ... વરસાવો.
તનમનમાં તમારા મંગલની ચાલે માળા;
અમંગલ ટાળો મારાં હે સંતન સાચા ! ... વરસાવો.
ક્ષમા ને દયા તમારી ત્રિભુવનમાં છે ન્યારી;
વખણાયે બલ ભારી હે સંતન સાચા ! ... વરસાવો.
વાદળને ભેદ નહીં, વરસે જ્યાં હોય તહીં;
વાયું રહે બધે વહી હે સંતન સાચા ! ... વરસાવો.
વિવેકજ્યોતિ જલાવો, અંધારાં ઊંડાં હલાવો;
શોક ને ચિંતા શમાવો હે સંતન સાચા ! ... વરસાવો.
થોડી પ્રીતિ ઘણી માની, આને જાણી વેદવાણી;
પ્રસન્ન હો જ્ઞાની દાની હે સંતન સાચા ! ... વરસાવો.
'પાગલ’ તમારે માટે તેને મળો શિરસાટે;
વિનવું નેહને નાતે હે સંતન સાચા ! ... વરસાવો.
વરસાવો કૃપાવૃષ્ટિ હે સંતન સાચા !
સરજી દો નવી સૃષ્ટિ હે સંતન સાચા ! ... વરસાવો.
- શ્રી યોગેશ્વરજી