MP3 Audio
*
તમે મારું કરશો પાર જહાજ (૨)
થાયે ડગમગ, હાલે રગરગ, આવે ઘોર અવાજ;
શ્રધ્ધા મારી તોય ન તૂટે, કેમે કરતાં આજ ... તમે મારું
ગરજે ઘોર તરંગો ભારે, વાજે વાયુ પખાજ;
ચારે કોર તિમિરદળ છાયાં, વર્ષા કરતી કાજ ... તમે મારું
ઘડી ગમે તેવી છો આવે, લેશ મને ના દાઝ;
સલામત તમારા હાથમહીં સદાયે મારી લાજ ... તમે મારું
આંસુ નથી કૈં ક્લેશ ન મારે, હે મારા શિરતાજ !
'પાગલ' કરો જરૂર કિનારે, આજે ગરીબનિવાજ ... તમે મારું
- શ્રી યોગેશ્વરજી