તમારે મુશ્કેલ કશું ના.
જે ધારો તે કરી શકો છો સત્ય કહું છું હા !
સર્વસમર્થ કહ્યા છે તેથી નાથ ચરાચરના ! ... તમારે
ખારો કૂપ કર્યો મિષ્ટ તમે, રંક કર્યા રાયા;
તેલ વિનાના દીપક બાળ્યા, કરો તમે શું ના ? ... તમારે
દ્રષ્ટિ અંધજનોને આપી એમ ગવાયે કથા;
અસાધ્ય દર્દ મટાડ્યાં કૈંનાં, મૃતને પ્રાણ ધર્યાં ... તમારે
ચિંતા ટાળી, ક્લેશ શમાવ્યા, ઉજ્જવળ માર્ગ કર્યા;
શરણાગતને પ્રેમે પાળ્યા, કૈં ભંડાર ભર્યાં ... તમારે
મારે માટે કેમ સુકાઇ આજ ગઇ કરુણા ?
સફળ કરી દો ઇચ્છા મારી, લેશ રહે ના મણા ... તમારે
- શ્રી યોગેશ્વરજી