પાર ઉતારો હે પ્રભુ મારા !
ભરદરિયે ભટકું છું આજે, ગરજે જળની ધારા;
પકડી રાખી જતન કરીને, મનોરથતણી માળા.....પાર ઉતારો
અશક્યને પણ શક્ય કરી દો, ગાયે ભક્ત તમારા;
એ જ ભરોસો રાખી બેઠો, જલતી અગણિત જ્વાળા....પાર ઉતારો
વાળ ગણાય છતાં ન ગણાયે, અપરાધ બધા મારા;
ખામી દોષ અનંત ખરે છે, ગુણ ના કોઈ સારા....પાર ઉતારો
નજર તમારા પર છે રાખી, નિરાશ ન કરો પ્યારા;
'પાગલ’ના પ્રભુ વ્હારે આવો, વરદાન લઈ ન્યારાં ! ...પાર ઉતારો
- શ્રી યોગેશ્વરજી