સાંઈ, અરજ કરી મેં આજે,
જોજો કીર્તિ તમારી લાજે !
તમારા વિના કોણ કહોને,
મારો સુણે અવાજે ?
નવાજો નહીં મુજને નેહે,
કોણ જ અન્ય નવાજે ? ....સાઈ.
સાચા દિલની કરી પ્રાર્થના,
સુણવી સત્વર છાજે;
કરી પ્રતિજ્ઞા પૂર્ણ તમે તો,
નિજ પ્રેમીને કાજે. ....સાઈ.
અંતર્યામી મૂર્તિ તમારી,
મારા મનમાં રાજે;
ગૌરવનાં ગીત તમારાં કૈં,
મુજ અંતરમાં ગાજે. ....સાઈ.
પોષણ પામું તમારી કૃપા-
તણા સુસ્વાદુ અનાજે;
રક્ષા કરો, તમારો બાળક
દવ વચ્ચે ના દાઝે ! ....સાઈ.
- શ્રી યોગેશ્વરજી