ગાયક તમે કર્યો છે મુજને, ગીત સદા ગાઉં,
પિયૂષ આ પૃથ્વીમાં ફરતાં પીઉં ને પાઉં !
કદી હિમાલયનાં શૃંગો પર ને જંગલ જાઉં,
સમુદ્ર તટ પર કદીક રણમાં, રસગંગા લાવું ! ... ગાયક
પ્રેમશાંતિના સરોદ છેડું બીજ મધુર વાવું,
ફાલે ફૂલે ફોરમ આપે, ગીત નવાં ગાઉં !
કટુતા તેમ વિષાદ વિશ્વનાં ખરેખર વહાવું,
બ્રહ્મા બની રચું, સંગીત સર્જેલ સુહાવું ! ... ગાયક
મધુર રાગથી ભર્યો છે મને, તમારું જ ગાઉં,
ગીત તમારાં કહો પછીથી કવિ કેમ કહાવું ?
આ માટે છે મને મોકલ્યો, ન્હવરાવું ન્હાવું;
તમે પરબ પ્રેમ તણી માંડી, તેમાંથી પાઉં ! ... ગાયક
- શ્રી યોગેશ્વરજી