સાધો, હું તો પ્રેમપૂજારી !
કૃષ્ણ હનુમાન બધાની વાત ક્યારની છાંડી,
ઘટઘટમાંહી સુણી લીધી છે જે ક્ષણથી જ સિતારી !
ઘટ ઘટ રાજે પ્રિયતમ મારે, રહ્યો બધેય છવાઇ,
ક્ષણ ક્ષણ મળે સુહાગરાતની મોજ, રહ્યો રસ ભારી !
સંધ્યાપૂજા ધ્યાન સાધના દીધી સઘળી છાંડી,
નથી જરીયે ફુરસદ પ્યારે પાઇ દીધી પ્યાલી !
પ્રેમતણી મદિરા પી પીને પ્રાણ બન્યો બડભાગી,
જ્યાં પડશે આ દેહ હશે ત્યાં હશે મક્કા મદિના કાશી.
- શ્રી યોગેશ્વરજી