માળી

માળી ?
હા, માળી.
વિશ્વની વિશાળ વાટિકામાં તમે મને માળી કરીને મોકલ્યો છે :
હા; માળી કરીને.

માળી ઉદ્યાનમાંથી ફોરમવંતા ફૂલને ચૂંટી લે છે,
અને ઉદ્યાનની માટીને તથા બીજી મલિનતાને પડતી મૂકે છે,
તેમ સંસારમાંથી સારને ગ્રહણ કરીને હું સાચવી રાખું છું,
એને જ તમારી તથા બીજાની સેવામાં ધરું છું.

અને જે અસાર અથવા અશુલ છે એના તરફ અંગુલિનિર્દેશ નથી કરતો :
એનું પ્રદર્શન કરીને વિશ્વના વિમળ વાતાવરણને વિષથી નથી ભરતો.

આ મારી પ્રકૃતિ છે, આદત છે,
અને એ આવી જ અખંડ રહેવાની છે.

- શ્રી યોગેશ્વરજી