ગુરુદેવ ! હું આપને પાય લાગું,
મને દિવ્ય દર્શન ધરો એ જ માગું (2)
તિતિક્ષા સદા શાંતિ-સંતોષ આપો,
કૃપાની સુધા રેલતા, કલેશ કાપો...ગુરુદેવ !
દુઃખોની ઝડી રોજ પડતી ભલેને (2)
તિરસ્કાર વિદ્વેષ વરસે વળી કે... ગુરુદેવ !
પરમની પ્રસાદી મળી એમ માનું (2)
સદા સાધનાપંથ સાનંદ કાપું... ગુરુદેવ !
પરમ નામની પૂર્ણ મસ્તી વધારી (2)
ધરો દિવ્યતા દિવ્યરૂપે પધારી... ગુરુદેવ !
હરી અજ્ઞતા ભક્તિ ઉરમાં જગાડો (2)
ચપલ ચિત્તને ચારુચરણે લગાડો... ગુરુદેવ !
MP3 Audio
રચના સમયના મનોભાવો
પ્રભુપંથે કઠોર કસોટીઓ પણ થતી હોય છે. એવી કસોટીની નાજુક પળોમાં પ્રાર્થના જ શાંતિ આપે છે.
પ્રતિકૂળતાને સહન કરવાની શક્તિ આપો. દુઃખોનો દાવાનળ પ્રગટે, આખી દુનિયા તિરસ્કાર વરસાવે ત્યારે પણ, પ્રભુ ! એ તારો પ્રસાદ છે એમ માનીને હસતે મુખે જીવનપંથે આગળ ને આગળ વધુ એવી જ માંગણી સાચો સાધક પ્રભુને-ગુરુને કરતો રહે છે.
પ્રતિકૂળ વાતાવરણમાં પણ પ્રભુનામમાં મારું હૈયું મસ્તી અનુભવ્યા કરે, સંસારના કોઈ આઘાત-પ્રત્યાઘાતની અસર ના થાય, અને હે પ્રભુ ! તારા જ નામમાં, તારા જ રૂપમાં મગ્ન બની જવાય, એ જ પ્રાર્થના.
જન્મજન્માંતરના મારા અજ્ઞાનને, હે પ્રભુ ! તમે દૂર કરો, ભક્તિભાવ જગાડો, ચિત્તને આપનાં શ્રીચરણોમાં લગાડો, અને અંતે યોગ્ય ભૂમિકા તૈયાર થતાં દિવ્યદર્શનની ભેટ ધરો.
રોજબરોજના જીવનમાં આવતા આઘાતો-પ્રત્યાઘાતો સામે ઝઝૂમવા પ્રભુ પાસે આ રીતે પ્રાર્થના થઈ.