શાળા અમારી માવડી, એનાં પીએ અમે પિયૂષ રે;
પ્રાણ એ પવિત્રશો કરે.
પામ્યાં શરીર એક માતથી, આપે બીજું શરીર આ માત રે;
આત્મામાં અજવાળાં પાથરે, કરે અંધકારથી મુક્ત જાત રે; .... શાળા.
એકને અમીભર્યે ખોળલે, અમે ખોલી અમારી આંખ રે;
બીજી ખોલે આંખ જ્ઞાનની, તેમ પૂરી પાડે છે પાંખ રે; ... શાળા.
માટીની કાયા છે એકની, ધરે બીજી સોનેરી કાય રે;
બંધન તોડી દે, શાંતિ દે, કલેશ કાપે ને આપે છાંય રે; ... શાળા.
વહાલી અમોને માવડી, તેમ શાળા વહાલી ખૂબ રે;
લેતાં મદદ એની પ્રેમથી,આખું જીવન કરીએ શુદ્ધ રે; ... શાળા.
ઉપકાર એના અનેક છે, એને ભૂલી શકીએ કેમ રે ?
સેવા કરીએ સ્નેહથી, બની ઉત્તમ રહીએ તેમ રે. ... શાળા.
શાળા અમારી માવડી, એનાં પીએ અમે પિયૂષ રે;
જેવી રીતે કોઈ ગાવડી,એનાં પોષે છે પાઈ દૂધ રે. ... શાળા.
- શ્રી યોગેશ્વરજી