જે જીવન થાય સુખી ને સુખને આપે,
જે કષ્ટ કૈંકનાં કાપે,
એ જીવનની કીમત છે સાચે કાંઈ,
એ ધન્ય જિંદગી, ભાઈ ! ...
આ જીવન એક પરબ જાણો,
ને વટેમાર્ગુ માનવ માનો;
જો પાણી પાઈ શકાય એથી કાંઈ,
એ ધન્ય જિંદગી, ભાઈ ! ...
આ જીવનજ્યોત પરમ એવી,
છે અંધકારથી પર જેવી;
અંધાર દૂર કોઈના કરાય કાંઈ,
એ ધન્ય જિંદગી, ભાઈ ! ...
આ જીવન બાગ મહાપ્રભુનો
એનો ગંધભર્યો ખૂણેખૂણો;
એ સુગંધ કોઈ પામે, છાયા કાંઈ,
એ ધન્ય જિંદગી, ભાઈ ! ...
આ નદી વહેતી સૌ માટે,
સૌ સ્નાન કરે એને ઘાટે;
જો વહી શકાયે એમજ સાચે કાંઈ,
એ ધન્ય જિંદગી, ભાઈ ! ...
આ ઝાડ જુઓ આરામ કરે,
એમાં માળા પંખી કૈંક ધરે;
જો અપાય એમજ શાંતિ કોકને કાંઈ,
એ ધન્ય જિંદગી, ભાઈ ! ...
- શ્રી યોગેશ્વરજી