ચીંચીં કરતી ચકલી આવી, ચણ ખાવાને કાજ,
આંગણિયામાં મળી ટોળલે, ઉડાડો ના આજ.
ઘૂ ઘૂ સ્વરમાં ગાતાં આવ્યાં, અનેક કબુતર આ;
દાણો ખાતાં સંપી કેવાં ? ઈર્ષા કરતાં ના.
કુદરતને ખોળે ફરનારી, ખિસકોલી બેચાર,
ફરી રહી છે સૌની સાથે, ભેદતણો ન વિચાર.
અનાજ નાખ્યું પરબડી મહીં, એથી આવ્યાં સૌ;
સૌ છે ભેગાં થયાં છતાંયે. એક જ લાગે સૌ.
આવી રીતે સંપ કરીને, સૌએ વાસ કરે;
ખાય, ભોગવે, ભેગાં મળતાં, રસ સૌને ય ધરે.
કેવી પૃથ્વી બની જાય તો ? લડવાનું ન રહે;
પ્રભાત ખીલે સુખશાંતિનું, સૌ આનંદ લહે.
આવો, આ પંખી પાસેથી, પાઠ શીખવા આજ;
ભેગાં મળી રમો સૌ સાથે, કરશો નાજ અવાજ.
- શ્રી યોગેશ્વરજી