હે ખિસકોલી, ખિસકોલી,
કોણે પાડ્યા તારા ચટાપટા ?
કોમળ તારી કાયા પરે કોણે હાથ મૂક્યો હેતમાં ?
કોણે પાડ્યાં આ નિશાન તારાં ? પગલાં જાણે રેતમાં.
હે ખિસકોલી, ખિસકોલી,
કોણે પાડ્યા તારા ચટાપટા ?
કોણ હશે એનો કલાકાર કે ચિત્રકાર પણ કોણ રહે ?
કોણે કરી એની કલ્પના હશે ? જોનારા સુખ શું લહે;
હે ખિસકોલી, ખિસકોલી,
કોણે પાડ્યા તારા ચટાપટા ?
ખેલવા માટે આવે ત્યારે હરખ અમને થાય છે;
દોડીએ તારી પાછળ ત્યારે કેવી દોડી તું જાય છે ?
હે ખિસકોલી, ખિસકોલી,
કોણે પાડ્યા તારા ચટાપટા ?
આવ, તને હું હાથ ફેરવું, ભોજન આપું ભાવતું;
તારા વિના મને એકલું રમવું સાચું કહું ના ફાવતું.
હે ખિસકોલી, ખિસકોલી,
કોણે પાડ્યા તારા ચટાપટા ?
- શ્રી યોગેશ્વરજી