ફુવારા, ફુવારા, ભરેલા રસે છો;
હસો, રોજ ઊડો, રડે માનવી છો !
તમે રોજ ધારા તમારી વહાવો,
કરો ગેલ ને ગેલ સૌને કરાવો;
નથી થાક, ચિંતા તમોને નથી કો,
ફુવારા, ફુવારા, સદાયે સુખી છો. ... ફુવારા.
મળ્યા આટલો હર્ષ ક્યાંથી તમોને ?
થતો પ્રશ્ન જોઈ ખરેખર અમોને;
તમે કર્મ કેવું મજાનું કરો છો ?
હજારો જનોને અમીથી ભરો છો. ... ફુવારા.
તમોને નિહાળી અમોને ય થાયે,
અમોને મળી હર્ષ આવો જ જાયે;
હસીએ, રમીએ, કરી કામને તો,
મળે દિવ્ય આનંદતો, શોક ના હો. .... ફુવારા.
- શ્રી યોગેશ્વરજી