તમારો પ્રેમ નહીં વિસરાય.
પ્રત્યેક પળે એના સ્મરણે હૈયું મારું ભરાય;
તમને ત્યાગી મનડું મારું ક્યાંય ન જાય જરાય ... તમારો પ્રેમ.
પવિત્ર દૈવી પ્રેમ હૃદયનો કેવી રીતે મરાય;
પ્રાણ વણાયો તેની સાથે; કીમત કેમ કરાય ! ... તમારો પ્રેમ.
અપાર શાંતિ ધરે અંતરને, દર્દ બધાંય હણાય;
શ્વાસોશ્વાસ થયો છે તે તો, તેનાથી જ ચલાય. ... તમારો પ્રેમ.
‘પાગલ’ ચાહે છે કે તમને કાયમકાજ પમાય;
વિરહવેદના વધુ વાર હવે મારાથી ન સહાય. ... તમારો પ્રેમ.
(રચના - ૨-૮-૧૯૫૭, શુક્રવાર)
– © શ્રી યોગેશ્વરજી