રૂપ તમારું આ રઢિયાળું
કામણગારું, કમનીય વળી
નેહથકી નીતરતું ન્યારું ... રૂપ તમારું
આંખ અમીમય, ચંદ્રથકીયે
વદન વધારે મધુમય ચારુ;
સ્વર્ગ સમાયું એમાં જાણે,
પરમધામ પણ ત્યાં છે હાર્યું ... રૂપ તમારું
અંગેઅંગે ઉડે ફુવારા,
ફોરમવંતા રસને ભાળું;
એ અવલોકી અંતર ઉછળે,
નાચી ઉઠે મનડું મારું ... રૂપ તમારું
ક્યા પુણ્યથી પાન મળ્યું આ
રૂપતણું ના જાણું, વારુ;
સંસાર સમાયો છે એમાં
શું અચરજ જો હૈયું હારું ... રૂપ તમારું
- શ્રી યોગેશ્વરજી