મોહિની લાગી, તમારી મોહિની લાગી.
હૃદયના વ્રજમાં પ્રણયની વેણુ આ વાગી,
મૂર્તિ મનડામાં તમારી રમે વરણાગી,
કૈંક દિનની સુતેલી તે ચેતના જાગી ... મોહિની લાગી
લોકની લજ્જા બધીએ ભીતિને ત્યાગી,
મન થયું છે રૂપના રસનું જ અનુરાગી;
તરસ છે તીખી ખરેખર પ્રાણને લાગી ... મોહિની લાગી
ચેન ક્યાંયે ના પડે, ભ્રમણા બધી ભાગી,
કહે ‘પાગલ’ વસ્તુ બીજી ના કશી માગી;
નયન સામે રૂપ દિન ને રાત હો રાગી ! ... મોહિની લાગી
- શ્રી યોગેશ્વરજી