ઓ ઈશ્વર, એવું દે !
હજાર યત્ન કરીએ તોપણ કામ થઈ ના રે’,
નિરાશાજ દેખાય બધેયે, નિષ્ફળતા બસ કે;
છતાંય નાસીપાસ ન બનિયે એવી આશિષ દે ! .... ઓ ઈશ્વર, એવું દે !
ચારે તરફ અશાંતિ જ લાગે, શાંતિ મળે ના શેં,
ચિંતા હોય ઘણીયે મોટી, શાંતિ લઈ તે લે,
છતાંય હિંમત ના હારીએ, એવી આશિષ દે ! .... ઓ ઈશ્વર, એવું દે !
સુધારિયે બીજાનું પણ એ ગાળો અમને દે,
નિંદા કરે, વગોવે, રાખે વેર વળી સૌ તે;
છતાંય પ્રેમ ન ખૂટે હૈયે, એવી આશિષ દે ! .... ઓ ઈશ્વર, એવું દે !
દુઃખ પડે, ને મુસીબતોનો પાર જરા ન રહે;
છતાંય અડગ રહીને ધપિયે, એવી આશિષ દે ! .... ઓ ઈશ્વર, એવું દે !
- શ્રી યોગેશ્વરજી