વિચરે વિશ્વે એક ફકીર
ચરાચરમહીં વ્યાપક તો પણ વસતા સરિતાતીર,
શિરડીમાં સાક્ષાત રહે છે, નિર્મળ જેનાં નીર.... વિચરે વિશ્વે.
અનંત યુગથી લીલા કરતા, રંક છતાંય અમીર;
સુમન થકીય સુવાસિત, સ્પર્શે પાવન થાય સમીર.... વિચરે વિશ્વે.
પરહિત કાજે કાયા ધારે, પરહિત કાજ અધીર;
જીવ જોખમે જતન કરે છે, ટાળે નિજજન પીર.... વિચરે વિશ્વે.
સમર્થ અન્ય નથી એના શો, દીનબંધુ ને વીર;
કોણ હશે કરુણાળુ વધારે, આ અવનીનું હીર ? .... વિચરે વિશ્વે.
પ્રાર્થે ને પોકારે તેનું બને અંગનું ચીર;
'પાગલ’ સ્મરણ કરે તે તરશે, શક્તિ નથી લગીર. ... વિચરે વિશ્વે.
- શ્રી યોગેશ્વરજી