લગની તમારી મને લાગી, ઓ સંતોના સ્વામી !
લગની તમારી મને લાગી !
મહિમા તમારો જાણી મન મારું માન્યું,
સુરતા સુતેલી મારી જાગી. ઓ સંતોના સ્વામી !
લગની તમારી મને લાગી !
નેત્રો નેહે નાહીને નિહાળે તમોને હવે,
બની ગયો આત્મા અનુરાગી. ઓ સંતોના સ્વામી !
લગની તમારી મને લાગી !
તમારા જ સ્મરણે લાગે સ્વર્ગ સમાયું સારું,
વીણા વહાલકેરી વાગી. ઓ સંતોના સ્વામી !
લગની તમારી મને લાગી !
ખાતાંપીતાં ને સૂતાં તમારા જ જાપ ચાલે.
ચિંતન બીજું દીધું છે ત્યાગી. ઓ સંતોના સ્વામી !
લગની તમારી મને લાગી !
કૃપાની પ્રસાદી પામી કૃતાર્થ થઈ જઉં હું ;
લીધું છે મેં માગી. ઓ સંતોના સ્વામી !
લગની તમારી મને લાગી !
લગની તમારી મને લાગી ! ઓ સંતોના સ્વામી !
લગની તમારી મને લાગી !
- શ્રી યોગેશ્વરજી