ઓ દેવ મારા, વરસો કૃપા છો !
પ્રેમસિંધુ ઉછળે મારે માટે તમારો,
એમાં ના ઓટ કદી હો;
આઠે પહોર રહો ભરતી ભલેને,
જીવનને ધન્ય કરી દો ! ... ઓ દેવ મારા.
ટમકે આ તારલિયા, લાખલાખ લોચનિયે
દેખો મને એમ છો;
હુંયે તમારું ચારૂ રૂપ જ નિહાળું,
પલક પડે ના હો ! ... ઓ દેવ મારા.
રજની સંગાથ રહે ચાંદલિયો તેમ તમે,
મારી સંગાથ સદા હો;
આવે અમાસ કદી મારે ના કિન્તુ,
અંગઅંગ અજવાળી દો ! ... ઓ દેવ મારા.
કોઈ તમારા વિના મારું કે પ્યારું ના
જીવનમહીં મને હો;
હૈયામાંયે તમારા મારે માટેની
ભાવોર્મિને ભરી દો ! ... ઓ દેવ મારા.
- શ્રી યોગેશ્વરજી